ആര്‍ട്ടിഫിഷ്യന്‍ ഇന്റലിജന്‍സ് അഥവാ നിര്‍മിത ബുദ്ധിയുടെ സഹായത്തോടെ സ്ത്രീകളെ വിവസ്ത്രരാക്കാന്‍ സഹായിച്ച ഡീപ്പ് ന്യൂഡ് എന്ന ആപ്ലിക്കേഷന്‍ അടച്ചുപൂട്ടി. സമൂഹമാധ്യമങ്ങളില്‍ ശക്തമായ പ്രതിഷേധം ഉയര്‍ന്ന സഹാചര്യത്തിലാണ് ഡീപ്പ് ന്യൂഡ് ആപ്ലിക്കേഷന്‍ അടച്ചുപൂട്ടിയത്.
വിനോദത്തിന് വേണ്ടിയാണ് മാസങ്ങള്‍ക്ക് മുമ്പ് ഡീപ്പ് ഫേക്ക് സോഫ്റ്റ് വെയര്‍ അവതരിപ്പിച്ചതെന്ന് സോഫ്റ്റ് വെയര്‍ നിര്‍മാതാക്കള്‍ പറയുന്നു. എന്നാല്‍ ഇതൊരു വൈറലായിമാറുമെന്ന് തങ്ങള്‍ പ്രതീക്ഷിച്ചില്ലെന്നും അതിലേക്കുള്ള ആളുകളുടെ വരവ് നിയന്ത്രിക്കാനായില്ലെന്നും ഡീപ്പ് ന്യൂഡ് നിര്‍മാതാക്കള്‍ പറയുന്നു. സുരക്ഷാ നടപടികള്‍ സ്വീകരിച്ചിട്ടും അഞ്ച് ലക്ഷത്തോളം പേര്‍ ഇത് ഉപയോഗിച്ചെങ്കില്‍ ഇവിടെ ദുരുപയോഗം നടക്കാനുള്ള സാധ്യതയേറെയാണെന്നും ആ രീതിയില്‍ പണമുണ്ടാക്കാന്‍ തങ്ങള്‍ ആഗ്രഹിക്കുന്നില്ലെന്നും ഡീപ്പ്ന്യൂഡ് ആപ്പ് പിന്‍വലിക്കുന്നതായും ട്വീറ്റില്‍ അതിന്റെ നിര്‍മാതാക്കള്‍ പറഞ്ഞു.
വസ്ത്രം ധരിച്ച ഒരു സ്ത്രീയുടെ ചിത്രം നല്‍കിയാല്‍ അവരെ നഗ്‌നയാക്കാന്‍ കഴിയുന്ന സോഫ്റ്റ് വെയറിനെതിരെ വലിയ വിമര്‍ശനങ്ങള്‍ ഉയര്‍ന്നു വന്നിരുന്നു. പണം വാങ്ങിയും സൗജന്യമായും ഡീപ്പ് ന്യൂഡ് ആപ്പിക്കേഷന്‍ ഉപയോഗിക്കാന്‍ സാധിക്കുമായിരുന്നു. ഡീപ്പ് ന്യൂഡ് പ്രവര്‍ത്തനരഹിതമായെങ്കിലും സോഫ്റ്റ് വെയറിന്റെ ചില പതിപ്പുകള്‍ ഇപ്പോഴും ലഭ്യമാണ്.
