ന്യൂഡല്‍ഹി: കേരള-കര്‍ണാടക അതിര്‍ത്തികള്‍ അടച്ച കര്‍ണാടക സര്‍ക്കാരിന്റെ നടപടിക്കെതിരെ കാസര്‍കോട് എംപി രാജ്മോഹന് ഉണ്ണിത്താന്‍ സുപ്രീംകോടതിയില്‍ ഹര്‍ജി സമര്‍പ്പിച്ചു. അതിര്‍ത്തി അടച്ചതോടെ രോഗി മരിച്ചതുള്‍പ്പെടെയുള്ള സംഭവങ്ങള്‍ ചൂണ്ടിക്കാണിച്ചാണ് ഹര്‍ജി.
കേരളവുമായുള്ള അതിര്‍ത്തികള്‍ തുറക്കാന്‍ കര്‍ണാടകത്തോട് നിര്‍ദ്ദേശിക്കണമെന്നാണ് ഹര്‍ജിയിലെ പ്രധാന ആവശ്യം. അതിര്‍ത്തികള്‍ അടയ്ക്കാനുള്ള തീരുമാനം സ്റ്റേ ചെയ്യണമെന്ന് ഉണ്ണിത്താന്‍ സുപ്രീംകോടതിയില്‍ സമര്‍പ്പിച്ച ഹര്‍ജിയില്‍ ആവശ്യപ്പെട്ടിട്ടുണ്ട്. രോഗികളുമായി പോകുന്ന ആംബുലന്‍സ് പോലും തടഞ്ഞതോടെ മരണപ്പെട്ട സംഭവം നടന്നതായും രാജ്മോഹന് ഉണ്ണിത്താന്‍ ചൂണ്ടിക്കാട്ടി. കഴിഞ്ഞ ദിവസം കര്‍ണാടക അതിര്‍ത്തിയായ തലപ്പാടിയില്‍ ആംബുലന്‍സ് തടഞ്ഞതോടെ ആശുപത്രിയില്‍ എത്തിക്കാനാകാതെ കര്‍ണാടക സ്വദേശിനിയായ ഒരു രോഗിയും മഞ്ചേശ്വരം സ്വദേശിയും മരിച്ചിരുന്നു. ആംബുലന്‍സ് തടഞ്ഞതോടെ പാട്ന സ്വദേശിനിക്ക് വാഹനത്തില്‍ തന്നെ പ്രസവിക്കേണ്ട സാഹചര്യവുമുണ്ടായി.
തലപ്പാടി വഴിയുള്ള ചരക്ക് നീക്കവും നിലച്ചിട്ട് ആഴ്ചയോളമായി. കേരളത്തിലേക്കുള്ള ചരക്ക് ലോറികള്‍ കര്‍ണാടകയില്‍ പിടിച്ചിട്ടിരിക്കുകയാണ്. അതിര്‍ത്തികള്‍ തുറക്കാന്‍ കര്‍ണാടകത്തോട് ആവശ്യപ്പെടണമെന്ന് മുഖ്യമന്ത്രി പിണറായി വിജയന്‍ പ്രധാനമന്ത്രിയോട് അഭ്യര്‍ഥിച്ചിരുന്നു. അമിത് ഷാ മുഖ്യമന്ത്രിയെ വിളിച്ചെങ്കിലും ഇതുവരെ നടപടി ആയിട്ടില്ല. ഈ സാഹചര്യത്തിലാണ് രാജ്മോഹന് ഉണ്ണിത്താന്‍ സുപ്രീംകോടതിയെ സമീപിച്ചത്.
Content highlight: Raj Mohan Unnithan move to Supreme Court on Kerala- Karnataka border issue
