പുണ്യം പെയ്ത നോമ്പുകാലത്തിനൊടുവിൽ ഇന്ന് ഈദുൽ ഫിത്ർ. തിങ്കളാഴ്ച മാസപ്പിറവി കണ്ടതായി വിശ്വാസയോഗ്യമായ വിവരം ലഭിക്കാത്തതിനാൽ നോമ്പ് 30 പൂർത്തിയാക്കിയശേഷമാണ് ബുധനാഴ്ച പെരുന്നാൾ ആഘോഷം. വിശ്വാസികള്‍ ഇന്നു രാവിലെ പെരുന്നാള്‍ നമസ്‌കാരം നിര്‍വഹിക്കും. സ്നേഹവും സാഹോദര്യവും പങ്കുവെക്കുന്ന ചെറിയ പെരുന്നാള്‍ ദിനം ബന്ധുകള്‍ക്കും സുഹൃത്തുകള്‍ക്കും ഒപ്പം ആഘോഷിക്കുന്ന ആഹ്ളാദത്തിലാണ് വിശ്വാസ സമൂഹം.
മുംബൈ, ഡല്‍ഹി, ചെന്നൈ, ബംഗളുരു എന്നിവിടങ്ങളിലും ഇന്നാണു ചെറിയ പെരുന്നാള്‍. പള്ളികളിലും ഈദ് ഗാഹുകളിലും വിപുലമായ സൗകര്യങ്ങള്‍ ഒരുക്കിയിട്ടുണ്ട്. ഒമാന്‍ ഒഴികെയുള്ള ഗള്‍ഫ് രാജ്യങ്ങള്‍ ചൊവ്വാഴ്ച ചെറിയ പെരുന്നാള്‍ ആഘോഷിച്ചിരുന്നു. മക്കയിലും മദീനയിലുമായി 20 ലക്ഷത്തിലധികം പേര്‍ പെരുന്നാള്‍ നമസ്‌കാരത്തില്‍ പങ്കെടുത്തതായാണു കണക്ക്.
