സംവിധായകന്‍ ജിബു ജേക്കബും ബിജുമേനോനും ഒന്നിക്കുന്ന ഏറ്റവും പുതിയ ചിത്രം ആദ്യരാത്രിയുടെ ഫസ്റ്റ് ലുക്ക് പോസ്റ്റര്‍ പങ്കുവച്ച് സംവിധായകന്‍. ജിബു ജേക്കബിന്റെ മൂന്നാമത്തെ ചിത്രമാണ് ആദ്യരാത്രി.
‘വട്ടക്കായലിന്റെ കുഞ്ഞോളങ്ങള്‍ തഴുകുന്ന മുല്ലക്കര എന്ന കൊച്ചു ഗ്രാമത്തിലെ വിശേഷങ്ങള്‍ ഇവരിലൂടെ എന്നു പറഞ്ഞു കൊണ്ടാണ് ഫസ്റ്റ് ലുക്ക് പോസ്റ്ററിന്റെ ചിത്രം പങ്കു വച്ചിരിക്കുന്നത്.
നാട്ടിമ്പുറത്തെ ഒരു കല്യാണ ബ്രോക്കറിന്റെ വേഷത്തിലാണ് ചിത്രത്തില്‍ ബിജു മേനോന്‍ എത്തുന്നത്. അനശ്വര രാജന്‍ നായിക കഥാപാത്രത്തില്‍ എത്തുന്നു. ക്വീന്‍ എന്ന സിനിമയുടെ തിരക്കഥ രചിച്ച ഷാരീസ്-ജെബിന്‍ എന്നിവര്‍ ചേര്‍ന്നാണ് ആദ്യരാത്രിയുടേയും തിരക്കഥ ഒരുക്കിയിരിക്കുന്നത്. സെന്‍ട്രല്‍ പിക്‌ചേഴ്‌സ് ചിത്രം നിര്‍മിച്ചിരിക്കുന്നു. സന്തോഷ് വര്‍മ, ഹരിനാരായണന്‍, അജിത് എന്നിവര്‍ രചിച്ച ഗാനങ്ങള്‍ക്ക് ബിജിപാല്‍ സംഗീതം നല്‍കിയിരിക്കുന്നു.
വട്ടക്കായലിന്റെ കുഞ്ഞോളങ്ങൾ തഴുകുന്ന 'മുല്ലക്കര ' എന്ന കൊച്ചു ഗ്രാമത്തിലെ വിശേഷങ്ങൾ ഇവരിലൂടെ തുടങ്ങുന്നു……❤️❤️
Posted by Jibu Jacob on Tuesday, 16 July 2019
ബിജു മേനോനൊപ്പം മനോജ് ഗിന്നസ്, അജു വര്‍ഗ്ഗീസ്, വിജയരാഘവന്‍, ബിജു സോപാനം, സര്‍ജാനോ ഖാലിദ്, വിനോദ് കെടാമംഗലം, നസീര്‍ സംക്രാന്തി, പ്രശാന്ത് മുഹമ്മ, സുധി കൊല്ലം, ഭരതന്‍, സുമേഷ്, ജാതവേദ്, അനൂപ്, ക്യൂന്‍ ഫെയിമായ അശ്വിന്‍, ശ്രീലക്ഷ്മി, പൗളി വത്സന്‍, സ്‌നേഹ, വീണ നായര്‍, ശോഭ, സ്റ്റെല്ല, കാര്‍ത്തിക, സാനിയ, ഷെനി സാറ തുടങ്ങിയവരും ചിത്രത്തില്‍ എത്തുന്നുണ്ട്.
‘ഒരു ഇന്ത്യന്‍ പ്രണയകഥ’യ്ക്ക് ശേഷം സെന്‍ട്രല്‍ പിക്‌ചേഴ്‌സ് നിര്‍മ്മിക്കുന്നതാണ് ഈ ചിത്രം. കൂടാതെ ബിജു മേനോന്‍ ജിബു എന്നിവര്‍ നാലു വര്‍ഷങ്ങള്‍ക്കു ശേഷം വീണ്ടും ഒന്നിക്കുന്നു എന്ന പ്രത്യേകതയും ചിത്രത്തിനുണ്ട്. ഇതിനു മുമ്പ് ജിബുവിന്റെ സംവിധാനത്തില്‍ എത്തിയ വെള്ളിമൂങ്ങ, മുന്തിരി വള്ളികള്‍ തളിര്‍ക്കുമ്പോള്‍ എന്നീ ചിത്രങ്ങള്‍ ഏറെ ശ്രദ്ധിക്കപ്പെട്ടിരുന്നു.
