ജാട്ട് സമുദായത്തിൻ്റെ ശക്തമായ പ്രതിഷേധത്തെ തുടർന്ന് ജയ്പൂരിലെ തിയറ്ററുകൾ “പാനിപത്തി”ൻ്റെ പ്രദർശനം താൽക്കാലികമായി നിർത്തിവെച്ചു. അശുതോഷ് ഗോവര്‍ക്കർ സംവിധാനം ചെയ്യുന്ന ഏറ്റവും പുതിയ ചിത്രമാണ് “പാനിപത്ത്”. രാജ് മന്ദിര്‍, സിനിപൊളിസ്, ഇനോക്സ് തിയേറ്റേഴ്സ് എന്നീ തിയേറ്ററുകളിലാണ് ചിത്രത്തിന്‍റെ പ്രദര്‍ശനം നിർത്തിയത്.
ഭാരത്പൂര്‍ മഹാരാജ സൂരജ്മാലിന്‍റെ കഥാപാത്രത്തെ തെറ്റായി ചിത്രീകരിച്ചു എന്ന് ചൂണ്ടിക്കാട്ടിയാണ് ജാട്ട് സമുദായക്കാർ ചിത്രത്തിനെതിരെ പ്രതിഷേധവുമായി രംഗത്തെത്തിയത്. പാനിപത്തിലെ കേന്ദ്ര കഥാപാത്രങ്ങളായ അര്‍ജുന്‍ കപൂര്‍, സഞ്ജയ് ദത്ത്, കൃതി സനോണ്‍ എന്നിവര്‍ക്കെതിരെയും പ്രതിഷേധം ഉയർത്തിയിരുന്നു. അഡ്മിനിസ്ട്രേഷന്‍റെ നിര്‍ദ്ദേശപ്രകാരമാണ് പ്രദര്‍ശനം നിര്‍ത്തി വെച്ചത്. ഡിസംബർ 6 നാണ് ചിത്രം റിലീസ് ചെയ്തത്.
Content Highlight: Panipat movie screening stopped in Jaipur theatres
