അടൂര്‍: അഞ്ചലില്‍ മൂര്‍ഖന്‍ പാമ്പിനെ ഉപയോഗിച്ച് ഭാര്യയെ കൊലപ്പെടുത്തിയ കേസില്‍ പ്രതിയായ സൂരജിന്റെ അമ്മയെയും സഹോദരിയെയും പൊലീസ് അറസ്റ്റ് ചെയ്തു. ഗാര്‍ഹിക പീഡനക്കുറ്റവും വധക്കേസില്‍ സൂരജിന്റെ മൊഴിയെയും അടിസ്ഥാനപ്പെടുത്തിയാണ് അറസ്റ്റ് നടന്നത്.
ഇന്ന് ഉച്ചയോടെ അന്വേഷണ സംഘം ഇവരുടെ വീട്ടിലെത്തിയാണ് അറസ്റ്റ് രേഖപ്പെടുത്തിയത്. ഉത്ര വധക്കേസില്‍ കുടുംബത്തിനും ബന്ധമുണ്ടെന്ന് ഉത്രയുടെ മാതാപിതാക്കള്‍ പരാതി നല്‍കിയിരുന്നു. ഇതേ തുടര്‍ന്ന് ഇവരെ ആദ്യ ഘട്ടത്തില്‍ ചോദ്യം ചെയ്തിരുന്നു. ഗാര്‍ഹിക പീഡനമടക്കം തെളിവ് നശിപ്പിക്കല്‍ കുറ്റവും ഇവര്‍ക്ക് മേലുണ്ട്.
ഉത്രയെ പാമ്പിനെക്കൊണ്ടു കടിപ്പിച്ച് കൊലപ്പെടുത്തിയത് താനാണെന്നു പരസ്യമായി ഭര്‍ത്താവ് സൂരജ് ഏറ്റുപറഞ്ഞിരുന്നു. വനം വകുപ്പ് ഉദ്യോഗസ്ഥര്‍ പറക്കോട്ടുള്ള വീട്ടില്‍ തെളിവെടുപ്പിനായി കൊണ്ടു വന്നപ്പോഴാണ് സൂരജിന്റെ വെളിപ്പെടുത്തല്‍. മാധ്യമങ്ങളോട് എന്തെങ്കിലും പറയാനുണ്ടോയെന്ന് വനം വകുപ്പ് ഉദ്യോഗസ്ഥര്‍ ചോദിച്ചപ്പോഴാണ് പൊട്ടിക്കരഞ്ഞു കൊണ്ട് താനാണ് ഇതു ചെയ്തതെന്ന് പറഞ്ഞത്.
Content Highlight: Uthra Snakebite murder case Soorajs mother Renuka and sister Soorya arrested
