നിലവിൽ ട്രാൻസ്ജെൻഡർ വ്യക്തികൾക്ക് എൻസിസിയിൽ പ്രവേശനം നൽകാനുള്ള വ്യവസ്ഥയില്ലെന്നും അതിനാൽ പ്രവേശനം നൽകാൻ കഴിയില്ലെന്നും കേന്ദ്ര സർക്കാർ കേരള ഹെെക്കോടതിയിൽ പറഞ്ഞു. അതേസമയം കേന്ദ്ര നിലപാട് അംഗീകരിക്കാനാകില്ലെന്ന് കോടതി പറഞ്ഞു. ട്രാൻസ്ജെൻഡർ ആയത് കൊണ്ട് മാത്രം ഒരു വ്യക്തിയ്ക്ക് അവകാശം നിഷേധിക്കാൻ കഴിയില്ലെന്നും ഈക്കാര്യത്തിൽ സത്യവാങ്മൂലം സമർപ്പിക്കണമെന്നും കോടതി നിർദേശിച്ചു.
ട്രാൻസ്ജെൻഡർ ആയതുകൊണ്ട് എൻസിസിയിൽ പ്രവേശനം നിഷേധിക്കപ്പെട്ട തിരുവനന്തപുരം യൂണിവേഴ്സിറ്റി കോളേജ് വിദ്യാർത്ഥിനി ഹിന ഹനീഫ നൽകിയ ഹർജി പരിഗണിക്കുകയായിരുന്നു കോടതി. ജസ്റ്റിസ് ദേവൻ രാമചന്ദ്രൻ അടങ്ങുന്ന ബെഞ്ചാണ് ഹർജി പരിഗണിച്ചത്. എൻസിസിയുടെ 1948 ആക്ടിലെ സെക്ഷൻ 6 ആണ് ഹിന ചോദ്യം ചെയ്തത്. സെഷൻ 6 പ്രകാരം സ്ത്രീകൾക്കോ പുരുഷന്മാർക്കോ മാത്രമെ എൻസിസിയിൽ പ്രവേശനമുള്ളു.
ഈ മാസം 30 വരെ എൻസിസിയിൽ ഒരു സീറ്റ് ഒഴിച്ചിടണമെന്നും എൻസിസിയുടെ നിലപാട് എന്താണെന്ന് അടുത്ത വാദം കേൾക്കുമ്പോൾ കേന്ദ്രം വ്യക്തമാക്കണമെന്നും കോടതി കേന്ദ്ര സർക്കാരിനോട് ആവശ്യപ്പെട്ടു.
content highlights: No provision to allow transgender persons into NCC: Centre informs Kerala HC
