ശ്രീലങ്കയിൽ ജയിലിലുണ്ടായ കലാപത്തിൽ എട്ട് തടവുകാർ കൊല്ലപ്പെട്ടു. 37 പേർക്ക് പരിക്കേറ്റു. തടവുകാരിൽ ചിലർ ജയിൽ ചാടാൻ ശ്രമിച്ചതാണ് കലാപത്തിലേക്ക് വഴിവെച്ചത്. കൊളംബോയിൽ നിന്ന് 15 കിലോമീറ്റർ അകലെയുള്ള മഹാര ജയിലിൽ ഞായറാഴ്ചയാണ് സംഭവം നടക്കുന്നത്.
റിമാൻഡ് തടവുകാരിൽ കുറച്ചുപേർ ബലം പ്രയോഗിച്ച് വാതിൽ തുറക്കാൻ ശ്രമിക്കുകയും ജയിൽ അധികൃതർ ഇടപെടുകയും ചെയ്തതോടെയാണ് ആക്രമണം ഉണ്ടാകുന്നത്. സംഭവത്തിൽ ജയിലിനുള്ളിലെ അടുക്കളയും റെക്കോർഡ് മുറിയും അഗ്നിക്കിരയായതായി ജയിൽ അധികൃതർ അറിയിച്ചു. കലാപത്തിൽ പരിക്കേറ്റ 37 പേരെ അടുത്തുള്ള ആശുപത്രിയിലേക്ക് മാറ്റിയിട്ടുണ്ട്.
ഇവിടുത്തെ 175 തടവുകാർക്ക് കൊവിഡ് സ്ഥിരീകരിച്ചതോടെ തങ്ങളെ മറ്റൊരു ജയിലിലേക്ക് മാറ്റി താമസിപ്പിക്കാൻ തടവുകാർ ആവശ്യപ്പെട്ടിരുന്നു. ഇതിന് നടപടിയെടുക്കാത്തതിനെ തുടർന്നാണ് തടവുകാർ ജയിൽ ചാടാനുള്ള ശ്രമം നടത്തിയത്. 10,000 തടവുകാരെ മാത്രം ഉൾക്കൊള്ളാൻ സൌകര്യമുള്ള ലങ്കൻ ജയിലുകളിൽ നിവലിൽ 26,000ത്തിലധികം തടവുകാരാണ് തിങ്ങിപാർക്കുന്നത്.
content highlights: Riot breaks out at Sri Lanka prison when inmates try to escape, 8 killed, 37 injured
