സന്തോഷ് ശിവൻ സംവിധാനം ചെയ്യുന്ന ബോളിവുഡ് ചിത്രത്തിന്റെ ടൈറ്റിൽ പോസ്റ്റർ പുറത്ത്. വിജയ് സേതുപതി ബോളുവുഡിൽ അരങ്ങേറ്റം കുറിക്കുന്ന ആദ്യ ചിത്രം കൂടിയാണിത്. ‘മുംബൈക്കർ’ എന്നാണ് ചിത്രത്തിന് പേര് നൽകിയിരിക്കുന്നത്. 12 വർഷത്തിന് ശേഷം സന്തോഷ് ശിവൻ ഹിന്ദിയിൽ സംവിധാനം ചെയ്യുന്ന ചിത്രം കൂടിയാണ് മുംബൈക്കർ. 2008 ൽ പുറത്തിറങ്ങിയ തഹാൻ ആണ് ഹിന്ദിയിൽ മുൻപ് അദ്ദേഹം സംവിധാനം ചെയ്തത്.
ലോകേഷ് കനകരാജ് സംവിധാനത്തിൽ 2017 ൽ പുറത്തിറങ്ങിയ ആക്ഷൻ ത്രില്ലർ ചിത്രം ‘മാനഗര’ത്തിന്റെ ഹിന്ദി റിമേക് ആണ് പുതിയ ചിത്രം. മാനഗരത്തിൽ സുദീപ് കിഷൻ അവതരിപ്പിച്ച കഥാപാത്രത്തെ ഹിന്ദിയിൽ അവതരിപ്പിക്കുന്നത് വിക്രാന്ത് മസ്സേ ആണ്. സജ്ഞയ് മിശ്ര, രൺവീർ ഷോറെ, ടാനിയ മണിക്ടാല, സച്ചിൻ ഖഡേക്കർ തുടങ്ങിയവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. മഞ്ജു വാര്യരും കാളുദാസ് ജയറാമും സൌബിൻ ഷാഹിറും പ്രധാന കഥാപാത്രങ്ങളെ അവതരിപ്പിക്കുന്ന മലയാള ചിത്രം ജാക്ക് ആൻഡ് ജിൽ ആണ് സന്തോഷ് ശിവൻ സംവിധാനം ചെയ്ത മലയാള സിനിമ.
Content Highlights; Vijay Sethupathy new Bollywood movie
