പെൻഗ്വിൻ എന്ന ചിത്രത്തിന് ശേഷം കീർത്തി സുരേഷ് പ്രധാന കഥാപാത്രമായെത്തുന്ന തെലുങ്കു ചിത്രം മിസ് ഇന്ത്യ ഒടിടി റിലീസിനൊരുങ്ങുന്നു. നവംബർ 4ന് നെറ്റ്ഫ്ലിക്സിലൂടെ ചിത്രം റിലീസ് ചെയ്യും. ഏപ്രിൽ 17ന് പുറത്തിറക്കാനിരുന്ന ചിത്രം കൊവിഡ് കാരണം നീട്ടിവെയ്ക്കുകയായിരുന്നു. ചിത്രത്തിൻ്റെ ട്രെയിലർ അണിയറ പ്രവർത്തകർ പുറത്തുവിട്ടിട്ടുണ്ട്. നരേന്ദ നാഥാണ് ചിത്രം സംവിധാനം ചെയ്യുന്നത്. കീർത്തി സുരേഷിന് പുറമെ ജഗപതി ബാബു, നരേഷ്, നവീൻ ചന്ദ്ര, നദിയ മൊയ്തു, കമൽ കാമരാജു എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
ഇന്ത്യൻ തേയില വിദേശികൾക്ക് പരിചയപ്പെടുത്തുകയും വിൽക്കാൻ പദ്ധതിയിടുകയും ചെയ്യുന്ന ഒരു സംരംഭകയെയാണ് ചിത്രത്തിൽ കീർത്തി സുരേഷ് അവതരിപ്പിക്കുന്നത്. മലയാളത്തിലും തമിഴിലും ചിത്രം റിലീസ് ചെയ്യും. എസ്എസ് തമനാണ് ചിത്രത്തിൻ്റെ സംഗീത സംവിധാനം നിർവഹിച്ചിരിക്കുന്നത്. ജൂണിൽ പുറത്തിറങ്ങിയ പെൻഗ്വിൻ എന്ന തമിഴ് ചിത്രം ആമസോൺ പ്രൈമിലൂടെയാണ് റിലീസ് ചെയ്തത്.
content highlights: Keerthy Suresh slays as an aspiring entrepreneur in Miss India trailer
