ദേശീയ ചലചിത്ര പുരസ്കാര ജേതാവ് സച്ചിൻ കുന്ദൽക്കറിൻ്റെ കൊബാൾട്ട് ബ്ലൂവിൽ പ്രധാന കഥാപാത്രമായി പൂർണിമ ഇന്ദ്രജിത്ത്. ചിത്രത്തിലെ ഏക മലയാളി സാന്നിധ്യമായ പൂർണിമയുടെ ആദ്യ ബോളിവുഡ് ചിത്രം കൂടിയാണ് കൊബാൾട്ട് ബ്ലൂ. 2006ൽ മറാത്തിയിൽ പുറത്തിറങ്ങിയ സച്ചിൻ കുന്ദൽക്കറിൻ്റെ കൊബാൾട്ട് ബ്ലൂ എന്ന നോവലിനെ ആധാരമാക്കിയുള്ളതാണ് സിനിമ. പ്രതീക് ബബ്ബർ ആണ് ചിത്രത്തിലെ നായകൻ. വിഞ്ചെൻസോ കൊണ്ടറെലിയാണ് ക്യാമറ.
കുടുംബ ബന്ധങ്ങളുടെ പശ്ചാത്തലത്തിൽ ലെെംഗികത, സമൂഹം തുടങ്ങിയ വിഷയങ്ങളെ പ്രതിപാദിക്കുന്ന നോവൽ തനയ്, അനുജ സഹോദരിമാരുടെ കഥയാണ് പറയുന്നത്. ഇവരുടെ വീട്ടിൽ പേയിങ് ഗസ്റ്റ് ആയി താമസിക്കാൻ എത്തുന്ന യുവാവുമായി ഇരുവരും പ്രണയത്തിലാകുന്നു എന്നതാണ് പ്രമേയം. പ്രേക്ഷക ശ്രദ്ധ നേടിത വെബ് സീരിസ് ലെെലയുടെ നിർമാതാക്കളായ ഓപ്പൺ എയർ ഫിലിംസാണ് നെറ്റ്ഫ്ലിക്സിന് വേണ്ടി ചിത്രം നിർമിക്കുന്നത്. കൊച്ചിയിലാണ് സിനിമയുടെ ചിത്രീകരണം. നിവിൻ പോളി കേന്ദ്ര കഥാപാത്രത്തെ അവതരിപ്പിക്കുന്ന രാജീവ് രവി ചിത്രം തുറമുഖമാണ് ഇനി പൂർണിമയുടെ പുറത്തിറങ്ങാനുള്ള ചിത്രം.
content highlights: Poornima Indrajith in Sachin Kundalkar’s cobaltblue
