കോഴിക്കോട് രാമനാട്ടുകരയില്‍ വന്‍ ലഹരിമരുന്നു വേട്ട. 3 ലിറ്റര്‍ ഹാഷിഷ് ഓയിലാണ് ഫറോക്ക് എക്സൈസ് പിടികൂടിയത്. വിപണിയില്‍ മൂന്ന് കോടി രൂപയോളം വിലവരും ഇതിന്. പയ്യാനക്കല്‍ ചക്കുംകടവ് സ്വദേശി അന്‍വറിനെ എക്സൈസ് അറസ്റ്റ് ചെയ്തു. രാമനാട്ടുകര കെഎസ്ആര്‍ടിസി ബസ് സ്റ്റാന്‍ഡ് പരിസരത്തു നിന്നാണ് അന്‍വറിനെ പിടികൂടിയത്.
മൂന്ന് പൊതികളിലാക്കി ബാഗിലായിരുന്നു ഹാഷിഷ് ഓയില്‍ കൊണ്ടുവന്നത്. രാമനാട്ടുകരയില്‍ ബസില്‍ വന്നിറങ്ങുമ്പോഴാണ് ഫറോക്ക് എക്സൈസ് സംഘം ഇയാളെ പിടികൂടിയത്. രഹസ്യ വിവരത്തിന്‍റെ അടിസ്ഥാനത്തിലായിരുന്നു എക്സൈസിന്‍റെ നീക്കം. ആന്ധ്രയിലെ വിജയവാഡയില്‍ നിന്നാണ് ലഹരിമരുന്ന് എത്തിച്ചത്.
ഉത്സവ സീസണ്‍ ലക്ഷ്യമാക്കി നിശാപാര്‍ട്ടിക്ക് വേണ്ടിയാണ് ലഹരിമരുന്ന് എത്തിച്ചതെന്നാണ് മൊഴി. വിദ്യാര്‍ഥികള്‍ക്കിടയില്‍ വിതരണം ചെയ്യാനും പദ്ധതിയിട്ടെന്നാണ് മൊഴി. ഇത്രയും വലിയ അളവില്‍ കോഴിക്കോട്ട് ഹാഷിഷ് ഓയില്‍ പിടികൂടുന്നത് ആദ്യമായാണെന്ന് എക്സൈസ് അധികൃതര്‍ പറഞ്ഞു.
Content Highlights: hashish oil seized from ramanatukara Kozhikode
