നിപ പരിശോധനയ്ക്ക് അയച്ച് ഏഴ് സാംപിളുകളും നെഗറ്റീവാണെന്ന് ആരോഗ്യമന്ത്രി കെ കെ ശൈലജ. നിപ പ്രതിരോധ പ്രവര്‍ത്തനങ്ങള്‍ക്ക് കൂടുതൽ കേന്ദ്ര സഹായം തേടുമെന്നും മന്ത്രി ഡൽഹിയിൽ മാധ്യമപ്രവര്‍ത്തകരോട് വ്യക്തമാക്കി. നിലവിൽ വളരെ ആശ്വാസകരമായ അവസ്ഥയാണ്. ഇതുവരെ ഒരാള്‍ക്കു മാത്രമേ നിപ സ്ഥിരീകരിച്ചിട്ടുള്ളൂ. കളമേശേരിയിലെ ഐസൊലേഷൻ വാര്‍ഡിലുള്ള ഏഴ് പേരുടെയും രക്ത സാംപിളുകളിൽ നിപ വൈറസ് ഇല്ല. ജൂലൈ പകുതി വരെ നീരിക്ഷണം തുടരുമെന്നും നിലവിൽ ആശങ്കകൾക്കിടയിലെന്നും മന്ത്രി പറഞ്ഞു. കേരളത്തിൽ വൈറോളജി ഇൻസ്റ്റിറ്റ്യൂട്ട് അനുവദിക്കണമെന്ന് കേന്ദ്രസര്‍ക്കാരിനോട് അഭ്യര്‍ത്ഥിക്കുമെന്നും മന്ത്രി കൂട്ടിച്ചേര്‍ത്തു.
അതേസമയം രോഗബാധിതനായ തൊടുപുഴ പോളിടെക്നിക് കോളേജിലെ വിദ്യാർത്ഥിയുടെ ആരോഗ്യനിലയിൽ നല്ല പുരോഗതിയുണ്ട്. വൈറസ് ബാധയുടെ ഉറവിടം കണ്ടെത്താനുള്ള ശ്രമങ്ങള്‍ ആരോഗ്യവകുപ്പ് തുടരുകയാണ്. നിലവിൽ സംസ്ഥാനത്ത് 318 പേര്‍ നിരീക്ഷണത്തിലാണ്. പൂനെ വൈറോളജി ഇൻസ്റ്റിറ്റ്യൂട്ടിൽ നിന്നുള്ള സംഘം കളമശേരിയിൽ എത്തിയിട്ടുണ്ട്.
