പൂന: ഓര്‍ഡര്‍ ചെയ്ത ഭക്ഷണം മാറി എത്തിച്ചു നല്‍കിയതിന ഓണ്‍ലൈന്‍ ഫുഡ് ഡെലിവറി ആപ്പായ സൊമാട്ടോയ്ക്ക് 55,000 രൂപ പിഴ ഈടാക്കി പൂനയിലെ ഉപഭോക്തൃ കോടതി. ഭക്ഷണവിതരണ ആപ്ലിക്കേഷനും പൂനയിലെ ഭക്ഷണശാലയ്ക്കും കൂടെയാണ് ശിക്ഷ വിധിച്ചത്.
വെജിറ്റേറിയന്‍ ഭക്ഷണമായ പനീര്‍ ബട്ടര്‍ മസാല ഓര്‍ഡര്‍ ചെയ്ത അഭിഭാഷകനായ ഷണ്‍മുഖ് ദേശ്മുഖിനു ചിക്കന്‍ കൊണ്ടുള്ള ഒരു വിഭവമാണു സൊമാട്ടോ എത്തിച്ചു നല്‍കിയത്. ഭക്ഷണം തിരിച്ചറിയാന്‍ കഴിയാതെ ഷണ്‍മുഖ് ഇതു കഴിച്ചു. രണ്ടുവട്ടം ഇതു സംഭവിച്ചു. ഇതേതുടര്‍ന്നാണു ഷണ്‍മുഖ് കോടതിയെ സമീപിച്ചത്.
തങ്ങളുടെ കമ്പനിയെ അപമാനിക്കാനാണു ഷണ്‍മുഖ് ശ്രമിക്കുന്നതെന്നും ഭക്ഷണത്തിന്റെ പണം തിരികെ നല്‍കിയിട്ടുണ്ടെന്നും സൊമാട്ടോ കോടതിയില്‍ വാദിച്ചു. ഹോട്ടലിന്റെ ഭാഗത്തുനിന്നുണ്ടായ പിഴവിനു തങ്ങളെ കുറ്റപ്പെടുത്തരുതെന്നും ആവശ്യപ്പെട്ടു. സംഭവത്തില്‍ സൊമാട്ടോയ്ക്കും ഹോട്ടലിനും പിഴവ് സംഭവിച്ചിട്ടുണ്ടെന്നു കണ്ടെത്തിയ കോടതി ഇരുവര്‍ക്കും പിഴ വിധിക്കുകയായിരുന്നു. ഹോട്ടല്‍ ഉടമ നേരത്തെ തന്നെ കുറ്റം സമ്മതിച്ചിരുന്നു.45 ദിവസത്തിനുള്ളില്‍ നഷ്ടപരിഹാരം കൈമാറണമെന്നും കോടതി നിര്‍ദേശിച്ചു.
