പ്രേക്ഷകരിൽ ആകാംക്ഷയും ആവേശവും നിറച്ച് ‘ആൻഡ്രോയിഡ് കുഞ്ഞപ്പൻ വേർഷൻ 5.25’ ൻ്റെ ഫസ്റ്റ് ലുക്ക് പോസ്റ്റർ പുറത്തുവിട്ടു. ടൊവിനോ തോമസ് തൻ്റെ ഫേസ്ബുക്ക് പേജിലൂടെ റിലീസ് ചെയ്ത പോസ്റ്റർ ഇപ്പോൾ സാമൂഹ്യമാധ്യമങ്ങളിൽ തരംഗമായിക്കൊണ്ടിരിക്കുകയാണ്. ഹനുമാനെ പോലെ മാറ് പിളർന്ന് ഹ്യൂമനോയിഡും, മാറിനുള്ളിൽ സൗബിനും കൂടെ രാജാ രവിവർമയുടെ ‘ലക്ഷ്മി ഓൺ ലോട്ടസ്’ പെയിന്റിംഗിൻ്റെ പശ്ചാത്തലവുമാണ് ഫസ്റ്റ് ലുക്ക്.
സൌബിന്‍ ഷാഹിറിനെ കേന്ദ്ര കഥാപാത്രമാക്കി നവാഗതനായ രതീഷ് ബാലകൃഷ്ണൻ പൊതുവാളാണ് ചിത്രം സംവിധാനം ചെയ്യുന്നത്. മൂൺഷോട്ട് എന്‍റർടെയ്ൻമെന്‍റിന്‍റെ ബാനറിൽ സന്തോഷ് ടി. കുരുവിളയാണ് നിർമാണം. സുരാജ് വെഞ്ഞാറമൂട്, സൈജു കുറുപ്പ് എന്നിവരാണ് മറ്റ് കേന്ദ്ര കഥാപാത്രങ്ങൾ. മുംബൈ ആസ്ഥാനമാക്കി പ്രവർത്തിക്കുന്ന എക്സ് ഹൈറ്സ് ഡിസൈൻ അസ്സോസിയേറ്റ്സിന്‍റെ പ്രിൻസിപ്പൽ ഡിസൈനറും കോ ഫൗണ്ടറുമായ കെ.കെ. മുരളീധരനാണ് പോസ്റ്റർ രൂപകൽപന ചെയ്തിരിക്കുന്നത്.
