കോളേജ് പരിപാടിയിൽ പ്രസംഗിക്കുന്നതിനിടെ കൂവിയ വിദ്യാർഥിയെ സ്റ്റേജിലേക്ക് വിളിച്ചുവരുത്തി മൈക്കിലൂടെ കൂവിപ്പിച്ച സംഭവത്തിൽ നടൻ ടൊവിനോ തോമസിനെതിരെ നടപടി എടുക്കണമെന്ന് ആവശ്യപ്പെട്ട് കെ എസ് യു രംഗത്ത്. മാനന്തവാടി മേരി മാതാ കേളേജിൽ ദേശീയ സമ്മതിദാന അവകാശ ദിനാചരണത്തിന്റെ ഭാഗമായി നടന്ന പൊതു പരിപാടിയിൽ മുഖ്യാതിഥിയായിയാണ് ടൊവിനോ എത്തിയത്.
ടോവിനോ ഉദ്ഘാടന പ്രസംഗം നടത്തിക്കൊണ്ടിരിക്കുന്ന സമയത്ത് ഒരു വിദ്യാർഥി സദസിൽ നിന്നും കൂവുകയും ഈ വിദ്യാർഥിയെ സ്റ്റേജിലേക്ക് വിളിച്ചു വരുത്തിയ നടൻ മൈക്കിലൂടെ കൂവാൻ ആവശ്യപ്പെടുകയായിരുന്നു.
കൂവാൻ ആദ്യം വിസമ്മതിച്ച കുട്ടി സമ്മർദ്ദം ഏറിയപ്പോൾ ഒരു പ്രാവശ്യം കൂവുകയും അത് പോരാതെ നാല് പ്രാവശ്യം കുട്ടിയെ കൊണ്ട് കൂവിപ്പിച്ച ശേഷമാണ് സ്റ്റേജിൽ നിന്നും പോകാൻ അനുവദിച്ചത്. വിദ്യാർഥിയെ മറ്റ് വിദ്യാർഥികളുടെ മുന്നിൽ അപമാനിച്ച ടൊവിനോക്കെതിരെ നിയമ നടപടി ആവശ്യപ്പെട്ടാണ് കെഎസ്‌യു രംഗത്തെത്തിയിരിക്കുന്നത്. ഇതു സംബന്ധിച്ച് എസ്.പിക്ക് പരാതി നൽകുമെന്നും കെ.എസ്.യു നേതൃത്വം അറിയിച്ചു. വയനാട് ജില്ലാ കളക്ടറും സബ് കളക്ടറും ഇരിക്കുന്ന വേദിയിലായിരുന്നു സംഭവം അരങ്ങേറിയത്.
content highlights: ksu complained against actor Tovino Thomas
