ന്യൂഡല്‍ഹി: കൊവിഡ് പ്രതിരോധത്തിലേര്‍പ്പെട്ട ആരോഗ്യ പ്രവര്‍ത്തകര്‍ക്ക് ഏറ്റവുമധികം ആവശ്യമായ സ്വയം പ്രതിരോധ ഉപകരണങ്ങള്‍ ആവശ്യമായ അളവില്‍ ലഭ്യമാകുന്നില്ലെന്ന് സര്‍വേ റിപ്പോര്‍ട്ട്. പി.പി.ഇ. കിറ്റുകളുടെ ആഭാവം നേരത്തെ മുതല്‍ റിപ്പോര്‍ട്ട് ചെയ്തിട്ടുണ്ടെങ്കിലും മിക്ക ആശുപത്രികളിലും കിറ്റുകള്‍ വേണ്ട രീതിയില്‍ ലഭിക്കുന്നില്ലെന്നാണ് സര്‍വ്വേ ഫലം. പിപിഇ കിറ്റുകള്‍, എന്‍ 95 മാസ്‌കുകള്‍, ഗോഗിളുകള്‍, മുഖാവരണങ്ങള്‍ എന്നിവ മുന്‍നിരയില്‍ പ്രവര്‍ത്തിക്കുന്ന ആരോഗ്യ പ്രവര്‍ത്തകര്‍ക്ക് ലഭിക്കുന്നില്ലെന്ന് സര്‍വേ ചൂണ്ടികാട്ടുന്നു.
കൊവിഡ് മഹാമാരി പടര്‍ന്ന് പിടിച്ച ആദ്യ ആഴ്ച്ചകളില്‍ തന്നെ പിപിഇ കിറ്റുകള്‍ ഇറക്കുമതി ചെയ്തതായും ആവശ്യാനുസരണം കിറ്റുകള്‍ ലഭ്യമാണെന്നുമായിരുന്നു സര്‍ക്കാരിന്റെ അവകാശവാദം. 4.5 ലക്ഷത്തോളം ഗാര്‍ഹിക തൊഴിലാളികളും പിപിഇ കിറ്റ് നിര്‍മാണത്തില്‍ ഏര്‍പ്പെട്ടതോടെ ഇവക്ക് ക്ഷാമം ഇല്ലെന്ന് തന്നെയായിരുന്നു ധാരണ. എന്നാല്‍, ആരോഗ്യ മേഖലകയിലുള്ള സ്വതന്ത്ര ഗവേഷകര്‍ നടത്തിയ ഏറ്റവും പുതിയ സര്‍വ്വേയിലാണ് മുഖ്യധാരാ കൊവിഡ് പ്രതിരോധ പ്രവര്‍ത്തകര്‍ക്ക് ഇത്തരം ഉപകരണങ്ങള്‍ ലഭ്യമാകുന്നില്ലെന്ന് കണ്ടെത്തിയത്.
ഡോക്ടര്‍മാര്‍, താമസക്കാര്‍, ഇന്റേണുകള്‍, നഴ്സുമാര്‍, കമ്മ്യൂണിറ്റി ഹെല്‍ത്ത് വര്‍ക്കര്‍മാര്‍ എന്നിവരുടെ പ്രതികരണങ്ങളെ അടിസ്ഥാനമാക്കിയാണ് സര്‍വേ നടത്തിയത്. പ്രതികരിച്ചവരില്‍ മൂന്നിലൊന്ന് പേരും എന്‍95 മാസ്‌കുകള്‍ ലഭ്യമല്ലെന്ന് റിപ്പോര്‍ട്ട് ചെയ്തു. പിപിഇയെക്കുറിച്ചുള്ള ഔപചാരിക പരിശീലനത്തിന്റെ അഭാവവും സര്‍വ്വേയിലൂടെ കണ്ടെത്തി. പകുതിയിലധികം പേര്‍ക്കും പരിശീലനം ലഭിച്ചിട്ടില്ല, മറ്റുള്ളവര്‍ സ്വയം പരിശീലിച്ചതാണെന്നും സര്‍വ്വേ നടത്തിയവര്‍ അഭിപ്രായപ്പെട്ടു.
സര്‍വ്വേയില്‍ പങ്കെടുത്ത മൂന്നിലൊന്ന് പേരും തങ്ങളുടെ പിപിഇ കിറ്റുകള്‍ വീണ്ടും ഉപയോഗിക്കുന്നതായും കണ്ടെത്തി. എല്ലാ ഐസിയു തൊഴിലാളികള്‍ക്കും പോലും ആശുപത്രികളില്‍ പിപിഇ കിറ്റുകള്‍, കണ്ണടകള്‍, മുഖാവരണങ്ങള്‍ എന്നിവ പതിവായി ലഭിക്കുന്നില്ലെന്നും കണ്ടെത്തലുകള്‍ സൂചിപ്പിക്കുന്നു.
പൊതുമേഖലാ സൗകര്യങ്ങളിലോ റെഡ് സോണ്‍ ജില്ലകളിലോ സ്ഥിതി വ്യത്യസ്തമായിരുന്നില്ല. റെഡ് സോണ്‍ ജില്ലകളില്‍ ജോലി ചെയ്യുന്നവരില്‍ അഞ്ചില്‍ ഒരാള്‍ എന്‍95 മാസ്‌കുകള്‍ തങ്ങള്‍ക്ക് ലഭ്യമല്ലെന്ന് റിപ്പോര്‍ട്ട് ചെയ്തു. അതേസമയം, നിയുക്ത കോവിഡ് സെന്ററുകളില്‍ ജോലി ചെയ്യുന്നവരില്‍, മൂന്നിലൊന്ന് പേരും എന്‍95 മാസ്‌കുകള്‍ വേണ്ടത്ര അളവില്‍ പതിവായി ലഭ്യമാണെന്നും പ്രതികരിച്ചിട്ടുണ്ട്.
Content Highlight: Survey states Indian Hospitals doesn’t have adequate PPE Kits and Covid defense materials
