ബെംഗളൂരു മയക്കു മരുന്ന് കേസുമായി ബന്ധപെട്ട് ബോളിവുഡ് താരം വിവേക് ഒബ്റോയിയുടെ വീട്ടിൽ പോലീസ് തെരച്ചിൽ നടത്തി. മുംബൈയിലെ വീട്ടിൽ ബംഗ്ളൂരു പോലീസാണ് എത്തിയത്. വിവേകിന്റെ സഹോദരീ ഭർത്താവ് ആദിത് ആൽവയെ തേടിയാണ് പോലീസ് തിരച്ചിൽ നടത്തിയത്. ആദിത്യ ആൽവ ഒളിവിലാണ് . കർണാടകയിലെ മുൻമന്ത്രി ജീവരാജ് ആൽവയുടെ മകനാണ് ആദിത്യ ആൽവ.
സിനിമാ മേഖല ഉൾപെടുന്ന സാൻഡൽവുഡ് മയക്കു മരുന്ന് കേസിലാണ് ആദിത്യ ആൽവയെ തേടുന്നത്. ഇതുമായി ബന്ധപെട്ട് ഇതിനോടകം 15 പേരാണ് അറസ്റ്റിലായിട്ടുള്ളത്. മലയാളികളും കേസിൽ അറസ്റ്റിലായിട്ടുണ്ട്. അറസ്റ്റിലായ അനൂപ് മുഹമ്മദിന്റെ സുഹൃത്തായ ബിനീഷ് കോടിയേരിയേയും കേസിൽ ചോദ്യം ചെയ്യുന്നുണ്ട്. അനൂപും ബിനീഷും തമ്മിലുളള സാമ്പത്തിക ഇടപാടുകളെ കുറിച്ചായിരുന്നു ചോദ്യംചെയ്തത്.
വിവേക് ഒബ്റോയിയുടെ വീട്ടിൽ ആദിത് ആൽവ ഉണ്ടെന്ന വിവരം ലഭിച്ചതിനെ തുടർന്നായിരുന്നു പരിശോധനക്കെത്തിയതെന്ന് പോലീസ് വ്യക്തമാക്കി. അറസ്റ്റ് വാറണ്ടുമായാണ് ക്രൈംബ്രാഞ്ച് സംഘം പരിശോധനക്കെത്തിയതെന്ന് ബംഗളൂരു കമ്മീഷണർ സന്ദീപ് പാട്ടീൽ പറഞ്ഞു. ബംഗ്ളൂരുവിലെ ഹെബൽ തടാകത്തിന് സമീപമുള്ള സ്ഥലത്ത് ആദിത്യ ആൽവ ഡ്രഗ് പാർട്ടികൾ സംഘടിപ്പിച്ചിരുന്നതായാണ് പോലീസിന്റെ നിഗമനം. കേസിൽ പോലീസ് അറസ്റ്റ് തുടങ്ങിയപ്പോൾ മുതൽ ആദിത്യ ആൽവ ഒളിവിലാണ്.
Content Highlights; vivek obrois home searched as cops look for relative in drugs case
