കൊവിഡിൻ്റെ പശ്ചാത്തലത്തിൽ 93-ാം ഓസ്കർ പുരസ്കാര ദാനം രണ്ട് മാസത്തേക്ക് നീട്ടിവെച്ചു. 2021 ഫെബ്രുവരി 28ന് നടത്താൻ തീരുമാനിച്ചിരുന്ന ചടങ്ങാണ് മാർച്ച് 25ലേക്ക് നീട്ടിയത്. സിനിമകൾ സമർപ്പിക്കേണ്ട തീയതിയും ഫെബ്രുവരി 28 വരെ നീട്ടിയിട്ടുണ്ട്.
കൊവിഡ് വ്യാപനത്തിൽ ലോക വ്യാപകമായി പല സിനിമകളുടേയും റിലീസ് മുടങ്ങിയതിനെ തുടർന്നാണ് ഓസ്കർ പുരസ്കാര ദാനം നീട്ടിയത്. എന്നാൽ വെർച്വൽ ചടങ്ങാണോ അതോ താരങ്ങളെ പങ്കെടുപ്പിച്ചുകൊണ്ടുള്ള ചടങ്ങാണോ നടത്തുന്നതെന്ന് തീരുമാനമായിട്ടില്ല. ഒടിടി റിലീസ് ചെയ്യുന്ന ചിത്രങ്ങൾക്കും ഇത്തവണ അവാർഡിന് സമർപ്പിക്കാം.
ഇതിന് മുമ്പും ഓസ്കർ പുരസ്കാര ദാനം മാറ്റിവെച്ചിട്ടുണ്ട്. 1938ലെ ലോസ് ആഞ്ചലസ് പ്രളയം, 1968ലെ മാർട്ടിൻ ലൂതർ കിംഗ് കൊലപാതകം,1981ലെ റൊണാൾഡ് റീഗൻ വെടിവെപ്പ് എന്നീ അവസരങ്ങളിൽ പുരസ്കാര ദാനം നീട്ടിവച്ചിരുന്നു. എന്നാൽ ഇതാദ്യമായാണ് ഒരാഴ്ചക്ക് മുകളിൽ ചടങ്ങ് നീട്ടുന്നത്.
content highlights: Oscars 2021 ceremony postponed for two months
