താൻ ട്രാൻസ്ജെൻഡറാണെന്ന വെളിപ്പെടുത്തലുമായി ഹോളിവുഡ് താരം എലിയറ്റ് പേജ്. മുമ്പ് എലൻ പേജ് പിന്നീട് പേര് മാറ്റി എലിയറ്റ് പേജ് എന്നാക്കുകയായിരുന്നു. ഇൻസെപ്ഷൻ, എക്സ്-മെൻ തുടങ്ങിയ ചിത്രങ്ങളിലൂടെ പ്രശസ്തയായ എലിയറ്റ് ഔദ്യോഗിക പേജിലൂടെയാണ് തൻ്റെ ട്രാൻസ് വ്യക്തിത്വത്തെക്കുറിച്ച് തുറന്നു പറഞ്ഞത്. ഇനി മുതൽ അവൾ എന്നല്ല അവൻ എന്നായിരിക്കും ഉചിതമെന്നും എലിയറ്റ് പറഞ്ഞു. ഓക്സർ നോമിനേഷൻ ഉൾപ്പെടെ ലഭിച്ചിട്ടുള്ള താരമാണ് എലിയറ്റ് പേജ്. 2007 ൽ പുറത്തിറങ്ങിയ ജൂണോ എന്ന ചിത്രത്തിലെ അഭിനയത്തിനാണ് ഓസ്കർ നോമിനേഷൻ ലഭിച്ചത്. ക്രിസ്റ്റഫർ നോളൻ്റെ ഇൻസെപ്ഷനിലും പ്രധാന കഥാപാത്രത്തെ അവതരിപ്പിച്ചു.
‘ട്രാൻസ് ആണെന്നതിൽ ഞാൻ സന്തോഷിക്കുന്നു. ഈ യാത്രയിൽ എന്നെ പിന്തുണച്ച എല്ലാവർക്കും നന്ദി. എൻ്റെ യഥാർത്ഥ അസ്തിത്വത്തെ തിരിച്ചറിയുവാനും അത് പിന്തുടരുവാനും കഴിയുമ്പോളുള്ള അനുഭവം പറഞ്ഞറിയിക്കാൻ കഴിയുന്നതല്ല. ട്രാൻസ് സമൂഹത്തിലെ ഒരുപാട് പേർ എന്നെ സ്വാധീനിച്ചിട്ടുണ്ട്. ഓരോ ദിവസവും സമൂഹത്തിൽ അധിക്ഷേപിക്കപ്പെടുകയും അതിക്രമങ്ങൾക്ക് ഇരയാവുകയും ചെയ്യുന്ന എല്ലാ ട്രാൻസ് വ്യക്തികളോടും ഒരു കാര്യം പറയുന്നു. ഞാൻ നിങ്ങളെ ഇഷ്ടപ്പെടുന്നു. ഈ ലോകത്തെ കൂടുതൽ മികച്ചതാക്കാൻ എനിക്ക് സാധ്യമായ എല്ലാം ഞാൻ ചെയ്യും’. എലിയറ്റ് കുറിച്ചു.
content highlights: ‘Juno’ Star Elliot Page, Formerly Known As Ellen Page, Comes Out As Transgender
