താൻ കോൺഗ്രസിലേക്കെന്ന സോഷ്യൽ മീഡിയയിലെ പ്രചാരണത്തിൽ പ്രതികരണവുമായി നടി അനുശ്രി. ഇൻസ്റ്റഗ്രാം സ്റ്റോറിയിലാണ് അനുശ്രിയുടെ പ്രതികരണം. ‘ധര്‍മജന്‍ ഇഫക്ട് തുടരുന്നു അനുശ്രീയും കോണ്‍ഗ്രസിലേക്ക്’ എന്ന് സോഷ്യല്‍ മീഡിയയില്‍ പ്രചരിക്കുന്ന പോസ്റ്റര്‍ വ്യാജമാണെന്ന് വ്യക്തമാക്കി കൊണ്ടാണ് നടിയുടെ രൂക്ഷ പ്രതികരണം. ധർമജനും രമേഷ് പിഷാരടിയും ഇടവേള ബാബുവും കോൺഗ്രസ് വേദിയിലെത്തിയതിന് പിന്നാലെയാണ് അനുശ്രിയും കോൺഗ്രസിലേക്കെന്ന പ്രചാരണമുണ്ടായത്.
തന്റേത് കോണ്‍ഗ്രസ് കുടുംബമാണെന്നും യുഡിഎഫ് സ്ഥാനാർത്ഥികളുടെ വിജയത്തിനായി രംഗത്തിറങ്ങുമെന്നും അനുശ്രീ പറഞ്ഞു എന്ന തരത്തിലായിരുന്നു സോഷ്യൽ മീഡിയയിലെ പ്രചാരണം. “ഈ ആള്‍ക്കാര്‍ക്കൊന്നും ഒരു പണിയും ഇല്ലേ.. അറിയാന്‍ പാടില്ലാഞ്ഞു ചോദിക്കുവാ. വേറെ ന്യൂസ് ഒന്നും കിട്ടാനില്ലേ, കഷ്ടം” എന്നുമാണ് അനുശ്രീ ഇൻസ്റ്റഗ്രാമിൽ കുറിച്ചത്. നേരത്തെ തദ്ദേശ തെരഞ്ഞെടുപ്പ് നടന്നപ്പോള്‍ പത്തനംതിട്ടയില്‍ ഒരു യുഡിഎഫ് സ്ഥാനാര്‍ഥിക്കായി അനുശ്രീ പ്രചാരണത്തിന് ഇറങ്ങിയിരുന്നു. ബാലഗോകുലത്തിന്റെ ശ്രീകൃഷ്ണ ജയന്തി ആഘോഷങ്ങളില്‍ അനുശ്രീ പങ്കെടുത്തപ്പോഴും വാര്‍ത്തയായിരുന്നു.
Content Highlights; actor anusree about the congress entry
