കേരളത്തെ പിടിച്ചു കുലുക്കിയ നിപ്പ വൈറസ് പശ്ചാത്തലമാക്കി ആഷിക് അബുവിന്റെ സംവിധാനത്തില്‍ ഒരുങ്ങുന്ന വൈറസ് സിനിമയുടെ പുതിയ ഗാനം പുറത്തിറങ്ങി. സ്്‌നേഹം വൈറസ് പോലെ പടരണമെന്ന ആശയവുമായാണ് അണിയറ പ്രവര്‍ത്തകര്‍ ചിത്രത്തിന്റെ ആദ്യ ഗാനം പുറത്തു വിട്ടിരിക്കുന്നത്. സുശിന്‍ ശ്യമാണ് ഗാനത്തിന് സംഗീതം നല്‍കിയിരിക്കുന്നത്. ശ്രീനാഥ് ഭാസി, മഡോണ സെബാസ്റ്റിയന്‍ എന്നിവര്‍ മേക്കിങ് വീഡിയോയില്‍ പ്രത്യക്ഷപ്പെടുന്നുണ്ട്.
‘മനുഷ്യത്വത്തിലൂടെയും സഹജീവികളോടുള്ള സ്‌നേഹത്തിലൂടെയുമാണ് അതികഠിനമായ ഒരുവര്‍ഷം നമ്മള്‍ തരണം ചെയ്തത്. സ്‌നേഹം ഒരു വൈറസ് പോലെ പ്രചരിപ്പിച്ച ഓരോരുത്തര്‍ക്കും ഈ ഗാനം സമര്‍പ്പിക്കുന്നു’ എന്ന കുറിപ്പോടെയാണ് ചിത്രത്തിന്റെ അണിയറ പ്രവര്‍ത്തകര്‍ ഗാനം പങ്കുവെക്കുന്നത്.
മുഹ്സിന്‍ പരാരി, സുഹാസ്, ഷറഫു എന്നിവര്‍ ചേര്‍ന്ന് രചന നിര്‍വഹിച്ചിരിക്കുന്ന ചിത്രത്തിന്റെ ട്രെയിലര്‍ നേരത്തെ പുറത്തു വിട്ടിരുന്നു. കുഞ്ചാക്കോ ബോബന്‍, പാര്‍വതി തിരുവോത്ത്, ടൊവീനോ തോമസ്, ആസിഫ് അലി, രേവതി, റിമ കല്ലിങ്കല്‍, രമ്യ നമ്പീശന്‍, ജോജു തുടങ്ങിയവര്‍ പ്രധാന വേഷങ്ങളില്‍ എത്തുന്ന ചിത്രത്തില്‍ സൗബിന്‍ ഷാഹിര്‍, ദിലീഷ് പോത്തന്‍, ഇന്ദ്രന്‍സ്, ശ്രീനാഥ് ഭാസി, ദര്‍ശന, റഹ്മാന്‍, ഇന്ദ്രജിത്ത്, പൂര്‍ണിമ ഇന്ദ്രജിത്ത്, മഡോണ സെബാസ്റ്റിയന്‍ തുടങ്ങിയവരും അഭിനയിച്ചിട്ടുണ്ട്.
മലയാളത്തിലെ മുന്‍ താരങ്ങള്‍ എല്ലാം തന്നെ പ്രധാന വേഷം കൈകാര്യം ചെയ്യുന്ന ചിത്രം ഒരുക്കിയിരിക്കുന്നത് ഒപിഎമ്മിന്റെ ബാനറിലാണ്. ആഷിക്ക് അബുവും റിമ കല്ലിങ്കലും ചേര്‍ന്ന് നിര്‍മിച്ചിരിക്കുന്ന ചിത്രത്തിന്റെ ഛായാഗ്രാഹകന്‍ രാജീവ് രവിയാണ്. സുഷിന്‍ ശ്യാം സംഗീതവും എഡിറ്റിങ് സൈജു ശ്രീധരനുമാണ് നിര്‍വഹിച്ചിരിക്കുന്നത്. കേരളം പ്രതീക്ഷയോടെ കാത്തിരിക്കുന്ന ചിത്രം ജൂണ്‍ 7നാണ് തീയറ്ററുകളിലെത്തുന്നത്.
https://www.instagram.com/tv/ByMzdIxFSWT/?utm_source=ig_web_copy_link
