ബേബി പൗഡറിന്റെ 33,000 ടിന്നുകള്‍ തിരികെ വിളിച്ച് ജോണ്‍സണ്‍ ആൻഡ് ജോണ്‍സണ്‍. ഓൺലൈനിൽ വാങ്ങിയ ഒരൊറ്റ കുപ്പിയിൽ നിന്നുള്ള സാമ്പിളുകളിൽ ചെറിയ അളവിൽ ആസ്ബറ്റോസ് അംശം കണ്ടെത്തിയതിനെ തുടർന്ന് അമേരിക്കയിലാണ് പൗഡര്‍ ടിന്നുകള്‍ തിരികെ വിളിച്ചത്. ഇതാദ്യമായാണ് ജോണ്‍സണ്‍ ആൻഡ് ജോണ്‍സണ്‍ പൗഡര്‍ ടിന്നുകള്‍ തിരികെ വിളിക്കുന്നത്.
ജോണ്‍സണ്‍ ആൻഡ് ജോണ്‍സണിനെതിരെ നിരവധി കേസുകളാണ് ഇപ്പോൾ നിലനില്‍ക്കുന്നത്. ഇതില്‍ പലതിലും നിയമ നടപടികള്‍ തുടരുകയാണ്. കുപ്പികൾ പരീക്ഷിച്ച ഫുഡ് ആൻഡ് ഡ്രഗ് അഡ്മിനിസ്ട്രേഷനുമായി (എഫ്ഡിഎ) പ്രവർത്തിക്കുന്നുണ്ടെന്നും ഉൽപ്പന്നം എങ്ങനെ, എപ്പോൾ മലിനീകരിക്കപ്പെട്ടു എന്നതിനെക്കുറിച്ച് അന്വേഷണം ആരംഭിച്ചതായും കമ്പനി അറിയിച്ചു. മലിനമായ കുപ്പിയിൽ ഒരു തരം ആസ്ബറ്റോസ് ക്രിസോടൈൽ നാരുകൾ അടങ്ങിയിട്ടുണ്ടെന്ന് എഫ്ഡിഎ വക്താവ് ഗ്ലോറിയ സാഞ്ചസ്-കോണ്ട്രെറാസ് പറഞ്ഞു. എഫ്ഡിഎ പരീക്ഷിച്ച മറ്റൊരു ജോൺസന്റെ ബേബി പൗഡർ ആസ്ബറ്റോസിന് നെഗറ്റീവ് ആണെന്നും പറഞ്ഞു.
