ആലപ്പുഴ പട്ടണത്തിലെ യുവാക്കളുടെ കഥ പറഞ്ഞ് സാഗര്‍ ഹരിയുടെ സംവിധാനത്തില്‍ കുമ്പാരീസ് അണിയറയില്‍ ഒരുങ്ങുന്നു. നേരം എന്ന സൂപ്പര്‍ ഹിറ്റ് ചിത്രത്തിനു ശേഷം മലയാളത്തില്‍ ഇറങ്ങുന്ന എപ്പിസോഡിക്കല്‍ ചിത്രമെന്ന പ്രത്യേകതയും ഉണ്ട് കുമ്പാരീസിന്.
ആലപ്പുഴ സ്വദേശിയായ നവാഗത സംവിധായകന്‍ സാഗര്‍ ഹരി റിയലിസ്റ്റിക്കല്‍ ഡ്രാമയായാണ് ചിത്രം ഒരുക്കുന്നത്. ചിത്രത്തിന്റെ തിരക്കഥ ഒരുക്കിയിരിക്കുന്നതും സാഗര്‍ ഹരിയാണ്. സെന്‍സറിങ് മാത്രം പൂര്‍ത്തിയാകാനുള്ള ചിത്രത്തിലെ കലിപ്പ് എന്ന ഒരു പ്രോമോ സോങ് പുറത്തു വന്നിരുന്നു.
അബ്രഹാമിന്റെ സന്തതികള്‍, ക്യാപ്റ്റന്‍ എന്നീ ചിത്രങ്ങള്‍ നിര്‍മിച്ച ഗുഡ്‌വില്‍ എന്റര്‍ടെയ്ന്‍മെന്റ്‌സ് ആണ് കുമ്പാരീസ് നിര്‍മിക്കുന്നത്. ക്വീന്‍ ഫെയിം അശ്വിന്‍ ജോസ്, എല്‍ദോ മാത്യു, ജെന്‍സണ്‍, ടിറ്റോ വില്‍സണ്‍ എന്നിവര്‍ കേന്ദ്ര കഥാപാത്രങ്ങളാക്കി എത്തുന്ന ചിത്രത്തില്‍ പുതുമുഖങ്ങളാണ് നായികമാരായി എത്തുന്നത്. കൂടാതെ രമേശ് പിഷാരടി, വിജയകുമാര്‍, ഇന്ദ്രന്‍സ്, ധര്‍മ്മജന്‍, ഉല്ലാസ് പന്തളം, ബിനു അടിമാലി എന്നിവരും ചിത്രത്തില്‍ അഭിനയിച്ചിട്ടുണ്ട്.
കലിപ്പ് എന്ന പാട്ടിനു ശേഷം കഴിഞ്ഞ ദിവസം പുറത്തിറങ്ങിയ ആലപ്പുഴ എന്ന പാട്ടും ആരാധകര്‍ ഏറ്റെടുത്തിരുന്നു. സിബു സുകുമാരന്‍ സംഗീത സംവിധാനം നിര്‍വ്വഹിച്ചിരിക്കുന്ന ഗാനം ആലപിച്ചിരിക്കുന്നത് മധു ബാലകൃഷ്ണനാണ്. ജോബി ജോര്‍ജ്ജ് നിര്‍മിക്കുന്ന ചിത്രം ആഗസ്റ്റ് ആറിന് തീയ്യറ്ററുകളിലെത്തും.
