ഫഹദ് ഫാസിലിനെ നായകനാക്കി മഹേഷ് നാരായണന്‍ സംവിധനം ചെയ്യുന്ന മാലികിന്റെ ചിത്രീകരണം ആരംഭിച്ചു. 2017 ലെ അതിജീവന ത്രില്ലറായ ‘ടേക്ക് ഓഫ് ടീം വീണ്ടും ഒന്നിക്കുന്നവെന്ന പ്രത്യേകതയും ചിത്രത്തിനുണ്ട്. ”ടേക്ക് ഓഫ് ടീമുമായി ഒരിക്കല്‍ കൂടി ഒന്നിക്കുന്നതില്‍ സന്തോഷം, ഇന്ന് മുതല്‍ ‘മാലിക്’ റോളിംഗ്! നിങ്ങളുടെ അനുഗ്രഹങ്ങളും പിന്തുണയും പ്രതീക്ഷിക്കുന്നു.” എന്ന് ഫഹദ് തന്റെ ഫേസ്ബുക്ക് പേജിലൂടെ ടൈറ്റില്‍ പോസ്റ്റര്‍ പങ്കിടുന്നതിനൊപ്പം കുറിച്ചു.
തികച്ചും വ്യത്യസ്തമായ പ്രമേയത്തില്‍ ഒരുക്കുന്ന ചിത്രത്തിന് കണക്കാക്കിയിരിക്കുന്ന ബജറ്റ് 25 കോടി രൂപയാണ്. ഫഹദ് ഫാസിലിന്റെ കരിയറിലെ ഏറ്റവും വലിയ ചിത്രമായിരിക്കും മാലിക്. ആന്റോ ജോസഫാണ് ചിത്രം നിര്‍മ്മിക്കുന്നത്.
നിമിഷ സജയന്‍ ആണ് നായിക. ബിജു മേനോന്‍, ദിലീഷ് പോത്തന്‍, വിനയ് ഫോര്‍ട്ട് , ജലജ എന്നിവരും പ്രധാന വേഷങ്ങളിലെത്തുന്നു. 2020 ഏപ്രില്‍ 3ന് ചിത്രം തിയറ്ററുകളില്‍ എത്തും.
