കോൺഗ്രസ് വിട്ട നടി ഊർമ്മിള മഡോദ്ക്കർ നാളെ ശിവസേനയിൽ ചേരും. ശിവസേനാ നേതാവ് സഞ്ജയ് റാവത്താണ് ഈക്കാര്യം അറിയിച്ചത്. ഊർമ്മിള ശിവസേനയിൽ എന്ന് അംഗത്വമെടുക്കുമെന്ന ചോദ്യത്തിന് അവർ നാളെ പാർട്ടിയുടെ ഭാഗമാവുമെന്നായിരുന്നു റാവത്തിൻ്റെ പ്രതികരണം. കോൺഗ്രസിൽ നിന്ന് 2019 സെപ്റ്റംബറിലാണ് ഊർമ്മിള രാജിവെച്ചത്.
കഴിഞ്ഞ വർഷം മുംബെെയിലെ നോർത്ത് മണ്ഡലത്തിൽ നിന്ന് കോൺഗ്രസ് ടിക്കറ്റിൽ ഊർമ്മിള മത്സരിച്ചുവെങ്കിലും പരാജപ്പെട്ടിരുന്നു. ഇതിന് പിന്നാലെ കോൺഗ്രസ് നേതാക്കൾ തന്നെ പരാജയപ്പെടുത്താൻ ശ്രമിച്ചുവെന്ന് ചൂണ്ടിക്കാട്ടി ഊർമിള പാർട്ടിയിൽ നിന്ന് രാജിവെയ്ക്കുകയായിരുന്നു. ഊർമ്മിള ശിവസേനയിൽ ചേരുമെന്ന അഭ്യൂഹങ്ങൾ വന്നിരുന്നെങ്കിലും വിഷയത്തിൽ പ്രതികരിക്കാൻ ശിവസേന നേതൃത്വം ഇതുവരെ തയ്യാറായിരുന്നില്ല.
ഇക്കഴിഞ്ഞ ഒക്ടോബർ 30ന് ഊർമ്മിളയെ നിയമസഭ കൌൺസിലിലേക്ക് ശിവസേന നാമനിർദേശം ചെയ്തുവെന്ന റിപ്പോർട്ടുകളും ഉണ്ടായിരുന്നു. വിഷയത്തിൽ മുഖ്യമന്ത്രി ഉദ്ദവ് താക്കറെ ഉടൻ തീരുമാനമെടുക്കുമെന്ന് ശിവസേന നേതാവ് സഞ്ജയ് റാവത്ത് അന്ന് പറഞ്ഞിരുന്നു. സംസ്ഥാന നിയമസഭയുടെ അപ്പർ ഹൌസിലേക്ക് നാമനിർദേശം ചെയ്യുന്ന 12 പേരുടെ പട്ടികയിൽ ഊർമ്മിള മഡോദ്ക്കറിൻ്റെ പേരും ഉണ്ടെന്ന് റിപ്പോർട്ടും വന്നിരുന്നു.
content highlights: Urmila Matondkar to join Shiv Sena on December 1: Sanjay Raut
