തൊടുപുഴ: സംസ്ഥാനത്ത് തദ്ദേശ തെരഞ്ഞെടുപ്പിന്റെ ആദ്യ ഘട്ട വോട്ടെടുപ്പ് ആരംഭിച്ചതോടെ കടുത്ത ആത്മ വിശ്വാസത്തില്‍ കേരള കോണ്‍ഗ്രസ് പി ജെ ജോസഫ് വിഭാഗം. ജീവനുള്ള വസ്തുവാണ് തങ്ങളുടെ തെരഞ്ഞെടുപ്പ് ചിഹ്നമായ ചെണ്ടയെന്നും ചെണ്ടയിലെ സ്ഥാനാര്‍ത്ഥികളെല്ലാം ജയിക്കുമെന്നും പി ജെ ജോസഫ് ആത്മ വിശ്വാസം പ്രകടിപ്പിച്ചു.
യുഡുഎഫ് ചിഹ്നമായ കൈപ്പത്തിയും ചെണ്ടയുമായും ബന്ധമുണ്ടെന്നും, കൈകൊണ്ട് അടിച്ചാലേ ചെണ്ടക്ക് ശബ്ദമുണ്ടാകൂവെന്നും ജോസഫ് പറഞ്ഞു. കൈപ്പത്തിയും ചെണ്ടയും തമ്മിലുള്ള ബന്ധവും ഐക്യ ജനാധിപത്യ മുന്നണിയുടെ ഐക്യവും ഉള്ളതിനാല്‍ മികച്ച വിജയം നേടാമെന്ന പ്രതീക്ഷയിലാണ് കേരള കോണ്‍ഗ്രസ് ജോസഫ് വിഭാഗം സ്ഥാനാര്‍ത്ഥികള്‍.
രണ്ടില ചിഹ്നം നഷ്ടമായത് തെരഞ്ഞെടുപ്പ് വിജയത്തെ യാതൊരു തരത്തിലും ബാധിക്കില്ലെന്നും അദ്ദേഹം ചൂണ്ടികാട്ടി. ഒരു കണ്‍ഫ്യൂഷനുമില്ലെന്നും ചെണ്ടക്കു മുന്നില്‍ രണ്ടില വാടി കരിഞ്ഞു പോകുമെന്നും പി ജെ ജോസഫ് അവകാശപ്പെട്ടു. കൊവിഡ് വ്യാപനത്തെ തുടര്‍ന്ന് മൂന്ന് ഘട്ടമായി നടക്കുന്ന തദ്ദേശ തെരഞ്ഞെടുപ്പിന്റെ ആദ്യ ഘട്ടമാണ് ഇന്ന് നടക്കുന്നത്. സോപ്പിട്ട്, മാസ്‌കിട്ട്, ഗ്യാപ്പിട്ട് വോട്ട് ചെയ്യാന്‍ ജനങ്ങള്‍ എത്തണമെന്നാണ് സംസ്ഥാന സര്‍ക്കാരിന്റെ നിര്‍ദ്ദേശം.
Content Highlight: P J Joseph express confidence in Local Body Elections
