പൌരത്വ ഭേദഗതി നിയമത്തിനെതിരെ നാടകം അവതരിപ്പിച്ച സ്കൂളിലെ പ്രധാനാധ്യാപികയെയും ഒരു വിദ്യാർത്ഥിയുടെ അമ്മയെയും പൊലീസ് അറസ്റ്റ് ചെയ്തു. രാജ്യദ്രോഹക്കുറ്റം ചുമത്തിയാണ് ഇരുവരെയും പൊലീസ് അറസ്റ്റ് ചെയ്തിരിക്കുന്നത്. ഷഹീൻ എജ്യുക്കേഷൻ ഇൻസ്റ്റിറ്റ്യൂട്ടിലെ അധ്യാപിക ഫരീദയെയും വിദ്യാർത്ഥിയുടെ അമ്മയെയുമാണ് അറസ്റ്റ് ചെയ്തിരിക്കുന്നത്.
കർണാടകയിലെ ബിദാഹറിൽ സ്കൂൾ വാർഷികത്തിനിടെ പൗരത്വ ഭേദഗതി നിയമത്തിനും ദേശീയ പൗരത്വ പട്ടികയ്‌ക്കെതിരെയുമാണ് നാടകം അവതരിപ്പിച്ചത്.
എന്നാൽ വിദ്യാർഥികളെക്കൊണ്ട്‌ നാടകം കളിപ്പിച്ച്‌ പ്രധാനമന്ത്രിയെ അവഹേളിച്ചെന്ന പരാതിയിൽ കർണാടക പോലീസ് കേസെടുക്കുകയും സ്കൂൾ നേരത്തെ തന്നെ അടച്ചു പൂട്ടുകയും ചെയ്തിതിരുന്നു. സംഭവവുമായി ബന്ധപ്പെട്ട് നാല്, അഞ്ച് ക്ലാസുകളിൽ പഠിക്കുന്ന കുട്ടികളെയും പോലീസ് ചോദ്യം ചെയ്തിരുന്നു.
നാടകത്തിന്റെ വീഡിയോ പിന്നീട്‌ സാമൂഹമാധ്യമങ്ങളിൽ പ്രചരിപ്പിച്ചതിനെ തുടർന്ന് സംഘപരിവാർ പ്രവർത്തകനായ നിലേഷ്‌ രക്ഷ്യാലാണ്‌ പരാതി നൽകിയിരുന്നത്. പ്രധാനമന്ത്രിക്കെതിരെ മോശം പരാമർശങ്ങൾ നടത്തി എന്നതടക്കമുള്ള വകുപ്പുകളും ഇതിൽ ചുമത്തിയിട്ടുണ്ട്. സെക്ഷന്‍ 124എ, 504, 505(2), 153എ, 34 എന്നീ വകുപ്പുകള്‍ പ്രകാരമാണ് കേസെടുത്തിരിക്കുന്നതെന്നാണ് പൊലീസ് അറിയിച്ചിരിക്കുന്നത്.
അതേസമയം, പോലീസിൻ്റെ ഈ നടപടിക്കെതിരെ സ്കൂൾ മാനേജ്മെൻറ് രംഗത്തെ ത്തിയിട്ടുണ്ട്. കഴിഞ്ഞ മൂന്നു ദിവസമായി വിദ്യാർഥികളെയും സ്കൂൾ ജീവനക്കാരെയും പോലീസ് മാനസികമായി ഉപദ്രവിക്കുകയാണെന്ന് ഷാഹീൻ എഡ്യൂക്കേഷൻ ഇൻസ്റ്റിറ്റ്യൂട്ട് സിഇഒ തൗസീഫ് മടിക്കേരി പറഞ്ഞു.
content highlights: police arrested the head mistress and student’s mother who play the drama against caa in Karnataka
