അമേരിക്കൻ വൈസ് പ്രസിഡന്റ് സ്ഥാനാർത്ഥിയായി മത്സരിക്കുന്ന ഡെമോക്രാറ്റിക് പാർട്ടിയുടെ നേതാവ് കമലാ ഹാരിസിനായി പ്രാർത്ഥനയോടെ തമിഴ്നാട്ടിലെ ഗ്രാമം. ഗ്രാമത്തിലാകെ കമലാ ഹാരിസിന്റെ വലിയ കട്ടൌട്ടുകളും പോസ്റ്ററുകളും സ്ഥാപിച്ചിട്ടുണ്ട്. കമലാ ഹാരിസിന്റെ മുത്തച്ഛൻ പിവി ഗോപാലൻ ജനിച്ചു വളർന്ന തിരുവാരൂര്‍ ജില്ലയിലെ പൈങ്കനാട് ഗ്രാമത്തിൽ നാട്ടുകാർ കമലയുടെ വിജയത്തിനായി പ്രത്യേക പൂജയും നടത്തി. ധർമശാസ്ത്ര ക്ഷേത്രത്തിൽ നടത്തിയ പൂജകൾക്ക് ശേഷം അന്നദാനവുമുണ്ടായിരുന്നു.
പി വി ഗോപാലൻ്റെ മകൾ ഡോ ശ്യാമളാ ഗോപാലന്റെ മകളാണ് കമല. ഗോപാലന്റെ കുടുംബം വർഷങ്ങൾക്ക് മുൻപാണ് പൈങ്കനാട് ഗ്രാമത്തിൽ നിന്നും പോയത്. ഗ്രാമത്തിൽ നിന്നും പോയി എങ്കിലും ധർമശാസ്ത്രാ ക്ഷേത്രത്തിന്റെ പരിപാലനത്തിനായി സംഭാവന നൽകുന്നത് തുടർന്നിരുന്നതായി ഗ്രാമവാസികൾ വ്യക്തമാക്കി. ചെന്നൈ ബസന്ത് നഗറിലായിരുന്നു ഗോപാലൻ അവസാന നാളുകളിൽ കഴിഞ്ഞിരുന്നത്. കമലയുടെ വിജയം തങ്ങളുടെ കൂടി വിജയമാണെന്ന് പറഞ്ഞു കൊണ്ടാണ് നാട്ടുകാർ അന്നദാനവും പൂജകളും നടത്തിയത്.
Content Highlights; Special Victory Prayers For Kamala Harris In Ancestral Tamil Nadu Village
