തമിഴ്നാട്ടിൽ സീരിയൽ താരത്തെ വെട്ടികൊലപ്പെടുത്തി. 10 വർഷത്തോളമായി തമിഴ് സീരിയൽ രംഗത്ത് ശ്രദ്ധേയനായ സെൽവരത്നം (30) ആണ് കൊലപ്പെട്ടത്. ഞായറാഴ്ച രാവിലെയാണ് കൊലപാതകം നടന്നത്. സെൽവരത്നത്തിന് വെട്ടേറ്റതായി സുഹൃത്തുക്കൾ പൊലീസിനെ അറിയിക്കുകയായിരുന്നു. തോൻമൊഴി ബിഎ എന്ന സീരിയലിൽ വില്ലൻ വേഷത്തിലൂടെ ശ്രദ്ധേയനായ സെൽവരത്നം ശ്രീലങ്കൻ അഭയാർത്ഥിയാണ്.
ശനിയാഴ്ച സീരിയൽ ചിത്രീകരണത്തിന് പോകാതെ അസിസ്റ്റൻ്റ് ഡയറക്ടറായ സുഹൃത്തിനൊപ്പമാണ് തങ്ങിയിരുന്നത്. പുലർച്ചെ ഒരു കോൾ വന്നതിനെ തുടർന്ന് പുറത്തേക്ക് പോവുകയായിരുന്നു. പിന്നീട് കൊല്ലപ്പെട്ട വാർത്തയാണ് പുറത്തുവരുന്നത്. ഞാറാഴ്ച രാവിലെ 6.30ന് എംജിആർ നഗറിൽ വെച്ചാണ് സെൽവരത്നം ആക്രമിക്കപ്പെട്ടതെന്ന് മാധ്യമങ്ങൾ റിപ്പോർട്ട് ചെയ്യുന്നു. ഒട്ടോറിക്ഷയിലെത്തിയ ആക്രമികൾ കുത്തിയും വെട്ടിയും നടനെ കൊലപ്പെടുത്തുകയായിരുന്നെന്നാണ് റിപ്പോർട്ട്. നടൻ്റെ ഫോൺകോൾ വിവരങ്ങൾ കേന്ദ്രീകരിച്ചുള്ള അന്വേഷണം പുരോഗമിക്കുകയാണെന്ന് പൊലീസ് പറഞ്ഞു.
content highlights: TV serial Thenmozhi BA-fame actor Selvarathinam hacked to death in Chennai
