ദുല്‍ഖര്‍ സല്‍മാനും പാര്‍വതിയും അഭിനയിച്ച ആ വർഷത്തെ ബോക്സ് ഓഫീസ് ഹിറ്റ് ചിത്രമായി മാറിയ ചാർളി ഡിസംബര്‍ 24ന് അഞ്ചുവര്‍ഷം ആഘോഷിക്കുകയാണ്. മാര്‍ട്ടിന്‍ പ്രകാട്ട് സംവിധാനം ചെയ്ത ചിത്രത്തിൻ്റെ അഞ്ചാം വര്‍ഷത്തില്‍ സ്‌പെഷ്യല്‍ ട്രെയ്‌ലര്‍ പുറത്തുവിട്ടിരിക്കുകയാണ് ചാര്‍ലിയുടെ അണിയറ പ്രവര്‍ത്തകര്‍. നാല് മിനിറ്റ് ദൈര്‍ഘ്യമുള്ള ട്രെയ്‌ലര്‍ നിര്‍മ്മാതാവ് ഷെബിന്‍ ബക്കര്‍, സംഗീത സംവിധായകന്‍ ഗോപി സുന്ദര്‍ തുടങ്ങിയവരാണ് ഫേസ്ബുക്കിലൂടെ പങ്കുവെച്ചിരിക്കുന്നത്.
ചിത്രത്തിന് നല്‍കിയ സ്‌നേഹത്തിനും അഭിനന്ദനങ്ങള്‍ക്കും എല്ലാകാലവും നന്ദിയുണ്ടാവുമെന്ന് നായകന്‍ ദുല്‍ഖര്‍ സല്‍മാന്‍ പറഞ്ഞു. ചിത്രത്തിന്റെ തിരക്കഥാകൃത്തായ ഉണ്ണി ആറും ചാര്‍ലിയുടെ ഓര്‍മ്മകള്‍ പങ്കുവെച്ചിരുന്നു. 2013ല്‍ ചാര്‍ലി എന്ന കഥാപാത്രത്തെക്കുറിച്ച് ഏറ്റവും ആദ്യം കുത്തിക്കുറിച്ച വരികളുടെ ഫോട്ടോയാണ് ഉണ്ണി ആര്‍ ഇന്‍സ്റ്റഗ്രാമില്‍ പങ്കുവെച്ചത്. ’അയാള്‍ കാറ്റിനെപ്പോലെ, ജാതിയോ മതമോ ഇല്ലാത്തവന്‍, ലോകത്തോട് മുഴുവന്‍ പ്രണയം, വേണമെങ്കില്‍ ജിന്നെന്ന് വിളിക്കാം.’ എന്ന് കടലാസില്‍ എഴുതിയതിന്റെ ചിത്രമാണ് ഉണ്ണി ആര്‍ ഇന്‍സ്റ്റഗ്രാമില്‍ പോസ്റ്റ് ചെയ്തത്.
ദുല്‍ഖര്‍ സല്‍മാനായിരുന്നു കേന്ദ്ര കഥാപാത്രമായ ചാര്‍ലിയെ അവതരിപ്പിച്ചത്. പാര്‍വതിയായിരുന്നു നായിക കഥാപാത്രമായ ടെസയെ അവതരിപ്പിച്ചത്. അപര്‍ണ ഗോപിനാഥ്, നെടുമുടി വേണു, സൗബിന്‍ ഷാഹിര്‍, കല്‍പന, ടൊവിനോ തോമസ് എന്നിവരും ചിത്രത്തിലുണ്ടായിരുന്നു.
content highlights: Celebrating 5 Years of CHARLIE
