ഡല്‍ഹിയിലെ വായുമലിനീകരണത്തില്‍ പ്രതിഷേധം രേഖപ്പെടുത്തി ലിയോനാര്‍ഡോ ഡികാപ്രിയോ. തന്റെ ഇന്‍സ്റ്റഗ്രാം അക്കൌണ്ടിലൂടെയാണ് ഡല്‍ഹിയിലെ മലിനീകരണ തോത് ലോകത്തിന്റെ ശ്രദ്ധയില്‍പ്പെടുത്തി രംഗത്തുവന്നത്. പ്രതിസന്ധികളെക്കുറിച്ച് അവബോധം സൃഷ്ടിക്കാന്‍ തുടങ്ങിയ Extinction Rebellion എന്ന ഇന്‍സ്റ്റഗ്രാം അക്കൌണ്ടില്‍ പോസ്റ്റ് ചെയ്ത ചിത്രങ്ങളും കുറിപ്പും റിഗ്രാം ചെയ്താണ് ഡികാപ്രിയോ പ്രതിഷേധത്തില്‍ അണിചേര്‍ന്നത്.
ഡല്‍ഹിയിലെ ഇന്ത്യ ഗേറ്റിൽ നടന്ന പ്രതിഷേധത്തിൽ കൈയ്യില്‍ പ്ലക്കാര്‍ഡുകളുമായി നിരവധി പേര്‍ നിൽക്കുന്ന ചിത്രങ്ങളാണ് ഡികാപ്രിയോ ഇന്‍സ്റ്റഗ്രാമില്‍ പങ്കുവെച്ചത്. നഗരങ്ങളിലെ അപകടകരമായ മലിനീകരണ തോത് സംബന്ധിച്ച് അടിയന്തര നടപടി സ്വീകരിക്കണമെന്ന് ആവശ്യപ്പെട്ട് 1500 പേരാണ് ഇന്ത്യ ഗേറ്റിൽ ഒത്തുകൂടിയിരിക്കുന്നത്. ഇന്ത്യയിലെ പാരിസ്ഥിതിക പ്രശ്‌നങ്ങളെക്കുറിച്ച് ഡികാപ്രിയോ പ്രതികരിക്കുന്നത് ഇതാദ്യമല്ല. ജൂണില്‍, ചെന്നൈയിലെ ജല പ്രതിസന്ധി ശ്രദ്ധയില്‍പ്പെടുത്താന്‍ അദ്ദേഹം ഇന്‍സ്റ്റാഗ്രാമിലൂടെ രംഗത്തുവന്നിരുന്നു.
Content Highlight; Leonardo DiCaprio brings attention delhi’s air pollution crisis
