നവാഗതയായ ഇന്ദു വി എസ് സംവിധാനം ചെയ്യുന്ന ചിത്രത്തിലൂടെ വിജയ് സേതുപതി മലയാളത്തിൽ നായകനായി എത്തുന്നു. നിത്യ മേനോനാണ് നായിക. ആൻ്റോ ജോസഫാണ് ചിത്രം നിർമ്മിക്കുന്നത്. സിനിമയുടെ ചിത്രീകരണം ഉടൻ ആരംഭിക്കും. സിനിമയുടെ ഭൂരിഭാഗം രംഗങ്ങളും ചിത്രീകരിക്കുന്നത് കേരളത്തിലാകും. ഒന്നര വർഷം മുമ്പാണ് കഥ കേട്ട് വിജയ് സേതുപതി ചിത്രം ചെയ്യാൻ സമ്മതം അറിയിക്കുന്നത്. ദേശീയ പുരസ്കാര ജേതാവായ സലീം അഹമ്മദിൻ്റെ ആദാമിൻ്റെ മകൻ അബു, കുഞ്ഞനന്ദൻ്റെ കട, പത്തേമാരി എന്നീ ചിത്രങ്ങളിൽ പ്രവർത്തിയാളാണ് ഇന്ദു. ചിത്രത്തിൻ്റെ തിരക്കഥ ഒരുക്കുന്നതും ഇന്ദു വി എസ് തന്നെയാണ്.
കൊവിഡ് മാനദണ്ഡങ്ങൾ പാലിച്ചുകൊണ്ടായിരിക്കും സിനിമ എടുക്കുക. ചിത്രത്തിൻ്റെ കഥാപാത്രങ്ങൾ യാഥാർത്ഥ്യത്തോട് അടുത്ത് നിൽക്കുന്നവരാണെന്ന് നിത്യ മേനോൻ ടെെംസ് ഓഫ് ഇന്ത്യയോട് പറഞ്ഞു. നിഗൂഢതകൾ നിറഞ്ഞ രസകരമായ ഒരു കഥാപാത്രമായാണ് ചിത്രത്തിൽ വിജയ് സേതുപതി എത്തുക. അധികം കഥാപാത്രങ്ങൾ ഈ സിനിമയിൽ ഇല്ലാത്തതുകൊണ്ടു തന്നെ ഈ സമയത്ത് ചിത്രീകരണം ചെയ്യുന്നതിൽ തടസമുണ്ടാവില്ലെന്നും നിത്യ മേനോൻ പറഞ്ഞു. ചിത്രത്തിന് ഗോവിന്ദ് വസന്ത സംഗീത സംവിധാനവും മനീഷ് മാധവൻ ഛായാഗ്രഹണവും നിർവഹിക്കും. നേരത്തെ ജയറാം നായകനായി എത്തിയ മാർക്കോണി മത്തായി എന്ന ചിത്രത്തിൽ വിജയ് സേതുപതി അഭിനയിച്ചിരുന്നു.
content highlights: Vijay Sethupathi and Nithya Menen pair up for a Malayalam movie by Debut director Indhu VS
